O 30 de xaneiro Inés Rey presentou un orzamento de 379 millóns de euros para o 2025, pero os veciños da cidade tivemos que esperar ata a súa aprobación definitiva o 10 de abril para saber algo máis do chamado “Plan de Barrios”.
En rolda de prensa xa anuncia que, “non habendo unha data específica para informar do investimento” con todo si menciona que, “o goberno local está a impulsar un plan de intervencións en diversos distritos da cidade desde inicios de ano esperando que as obras arrinquen a mediados da semana seguinte”, é dicir finais de xuño, todo pola humanización e rexeneración dos barrios (pero sen os barrios). Vexamos algunhas “perlas” deste pomposo anuncio:
Plan de árbores urbanas 2025-2030 que neste ano contará cun orzamento de 600.000 €; dita actuación conlevará supostamente a creación de novos parques urbanos en Monte Martelo, Os Rosales e o Bosque de Breogán con 1.000.000 € e algunha actuación no Parque de Santa Margarita con outro 1.000.000 €. Hai que deterse na ausencia de especificación dos proxectos porque de que falamos plantación de árbores, previa talla? apertura de carreiros?ampliación de zonas verdes? E preguntámonos isto porque no mandato 2019-23 xa estaba proxectada unha importante actuación na ladeira do Monte de San Pedro con Rosales (que xa viña da Marea) e nada sabemos; de igual modo, no devandito mandato abriuse (co consenso e satisfacción dos veciños de Breogán e Feáns) un novo espazo verde, chamado precisamente Bosque de Breogán, entón este investimento é de mantemento?de ampliación de terreo? de plantación?, nada se sabe; o mesmo cabería dicir do Parque de Santa Margarita é continuación da recuperación do merendero? arranxo da área canina? cambio de mobiliario? colocación de aseos? renovación de árbores?
Plan de Parques Infantís 2025-2030, os veciños contarán cun parque a menos de 10 minutos da súa casa e 2 deles, tamén novos, serán cubertos,…. Se se di “dous de eles” é que hai máis cantos? onde? con que deseño? Se se sinala que o investimento ascende a un total de 8.000.000 € é porque xa se teñen todos eses datos non?.
Plan para os Barrios (2025-2028). Contempla investimentos por importe total de 53.700.000 €, só para unha primeira fase, que durará ata abril do 2027, e inclúe:
Plan de humanización e de rexeneración urbana por importe de 11.000.000 € que se entende por rexeneración e humanización? Sinalamos isto porque vemos con gran preocupación a gran cantidade de formigón e cemento que se está utilizando nas poucas obras que se están facendo pero pouco ou nada de espazos e prazas verdadeiramente verdes.
Equipamento deportivo con 8 pistas multideporte, 6.000.000 € , o mesmo de antes onde? con que trazados e contido?;
Melloras en espazos culturais e edificios como a Domus, o Fórum Metropolitano ou o Teatro Rosalía, 3.000.000 €; non son melloras, son máis que necesarias e urxentes actuacións de mantemento que xa deberían estar feitas desde hai moito tempo; e o capítulo mantemento non poden contemplalo realmente como un investimento senón como o que é: un servizo;
Rede de Centros Cívicos e Bibliotecas, 3.500.000 € onde? cantos?;
Acondicionamento dependencias municipais na antiga fábrica de Tabacos, 4.900.000 €;
Bibliotecas: Novo Mesoiro 1.500.000 €, Palavea 700.000 € (supoñemos que antes arranxarán a lea que teñen cos traballadores das actuais, porque senón non sabemos como van dotalas);
Novo Estadio e a reurbanización da contorna de Riazor para o Mundial 2030, 3.500.000 € en dúas anualidades, dos que 1.500.000 €, executaranse este ano coa redacción do proxecto, e do resto do proxecto que hai? sae ou non sae?;
Outras actuacións: remodelación de o Mercado de Santa Lucía con 3.800.000 €, o mercado de Monte Alto, con 6.000.000 €, reformarase a praza de Pontevedra (outra vez) con 450.000 €; creación dunha rede de oficinas de atención cidadá (OMAC) nos dez distritos da Coruña cunha dotación de 800.000 € en dúas anualidades.
A gran novidade de todo isto é que a alcaldesa pretende facelo a través de “escoitar a todos vos veciños, facelos participes na construción dá cidade”, algo que non deixa de ser unha ironía para alguén que deixou aos veciños e veciñas desta cidade sen orzamentos participativos e que está claro que non escoita, só oe, e xa sabemos que oír é percibir sons mentres que escoitar é prestar atención activa a eses sons.
A pouco que nos deteñamos a escoitar (nós si) este novo Plan podemos darnos conta de que a práctica totalidade desta nova carta aos Reis Magos contíñanse no programa electoral do pasado mandato e se en catro anos non fixo practicamente nada imos crer que nos dous que faltan para acabar este mandato si se van a facer?
Os barrios seguimos esperando a que se nos informe (xa o de que se nos pida opinión sería algo así como esperar que en Sevilla non faga calor en xullo), e que cumpra a súa palabra de visitar os barrios, e non para vir ás festas ou sacar unha foto e dicirnos o que decidiu facer, senón para escoitar, dialogar e acordar, porque senón o que pode ocorrer é o que pasou en Vos Mallos-Sardiñeira ou nas Casas de Franco.
Chama a atención que no mandato 2019-23 houbese unha concellería de barrios pero sen orzamento nin capacidade de decidir, pero polo menos contabamos cunha concelleira que se facía cargo de todas as nosas queixas e solicitudes; xa neste mandato a relación cos barrios asúmea Alcaldía directamente, que a asume pero non a desempeña, e como isto de reunirse e dialogar debe ser canso, a alcaldesa non tardou en crear as concellerías de Distrito que, salvo algunhas honrosas excepcións seguen sen funcionar e é que é difícil que o fagan se non se poden comprometer a nada xa que a decisión e o control dos orzamentos están secuestrados polo concelleiro reprobado polo Pleno.
Tal é a importancia que lle dá a señora Rey aos barrios que no recente equipo que nomeou como Secretaria Xeral dos socialistas coruñeses non existe unha área específica que se encargue da relación cos barrios como si tivo no anterior mandato.
Agora sorpréndenos coa creación das Oficinas de Atención Cidadá que tal como ela mesma sinalou é unha medida que soluciona a falta de comunicación cos barrios, é a primeira vez que lle escoitamos admitir que algo non funciona; en todo caso non debería confundirse as Oficinas que prestarán un servizo administrativo (axenda, certificados, información municipal, rexistro etc.)/ etc.), pero non político, por tanto a relación e o diálogo cos barrios seguirá sendo inexistente.
Non entendemos como se pretende construír unha cidade de costas aos seus cidadáns, e así poderiamos parafrasear unha frase famosa “todo para A Coruña pero sen os coruñeses”; temos a triste e insultante sensación de que a alcaldesa se toma a cidade como un xogo no que o único que importa é pasar pronto de pantalla o que descoñecemos é cara a que final.
